أبي أمي العزيزان ...آريـد جوآبـا ً (( يمنـع دخل العـزاب ))

السلآم عليكم

( يوجد بعض المصطلحات الي مالها داعي لكن طبعاً قسم فرفشه ولازم بهارات وشوي من التلقيح << وش عندك )

مدري من وين آبدى عشآن انتهي < كل ترآب آجل وإسكـت

خشو معي بنص السالفـه والي فهم يفهم والي مافهم يرسل لي رساله خاصه اعطيه رقم مدرس مصري خصوصي يشرح له وعلى فكره هالمصري كل شي يعرف له مايئولشي لأئه

يعني تبيه سباك فهو سباك تبيه يصلخ بعيد الاضحى يصلخ تبيه مدرس نحو على مواد شرعيه ماعنده مانع الي يشوف مخه يقول سي دي مجمع فيه كل المعلومات

السالفه ياجماعه الخير كل مافيها اني يومي صغير كنت بزر < ياخي لاتسولف تكفى

وكنت غثيث وعلّه ودعلّه <- راجع كتاب ((الاصول النجديه والكلمات الزبرجديه ))

من غثاثتي جارنا طلب لجوء سياسي لحي اخر والسبب اني غثيته فيعني يجي بالصباح الباكر وحرمته الحنونه((وش دراك))توها معطيته قبله صباحيه ليبدئ يوم حافل بالنجاح والمسرات ويجي يحمي سيارته وانا اشوفه اجي اسنتر عند دريشه السياره كني من هالطرارات الا تعطيني فلوس غصب وانا لأجلست عنده انشب له اعطيه من هالاسئله البايخه ولا اسولف عليه سوالف خاثره وهو يضحك ضحكه تشوفه تحلف انه مغصوب يضحك ومرات اضطر اني اجيب له واسطه عشان يضحك وعلى هالحال لما يمشي ومن يمشي جارنا ارجع عند الباب اتشوف لي احد طالع اروح اخثردز عليه من هالسوالف وانشده عن اشياء براسي < ركزو بهالكلمه تعني نص القصه

يعني مثلا جاء براسي اعرف وشهي مكونات الذره او مما يتكون المفاعل النووي رحت للمطار اقص لي تذكره اروح لروسيا او طهران او اي دوله عندها نووي وابدى اسئل لما اجد اجابه تشبع خلايا مخي الي تتاكل من التفكير بهالموضوع

رجعت عند الباب بعد ماحرك جارنا وكان يوم خميس يوم عطله ايام الاسبوع وكنا هاك الوقت يوم الخميس مايروح نحلل امه نصحى الفجر عشان نحس بطعم العطله ماعندنا شي بس فضاوه اطفال دوله <ياشيخ

جلست عند الباب وانا امارس هوايتي وهي اني ادخل يدي بخشمي حتى يوصل مخي وافررره بأصبعي السبابه ويدور مخي ويدور كنه مجسم الكره الارضيه لما يفرها مدرس الجغرافيا امام طلابه < تكفى لاتوصف

وانا امارس هوايتي واطير بط فريت مخي فررره قويه ودار مخي دوره مثل دوران الارض حول نفسها ووقف على سؤال وهالسؤال شغل خلايا مخي كلها بالبحث عن اجابه وبدت نفسي تتطلع الى الاجاابه ولدرجه ان السؤال اعجبني كنت جالس عند الباب لما وقف مخي على هالسؤال وقفت ثم رجعت جلست وقلت كيف ؟

السؤال هو (( كيف يتم الانجاب ووشلون يجون الاطفال بالدنيـا؟)) < سؤال دسم باين ان اليوم خميس

فكرت حاولت القى الاجابه مني قلت يمكن لاتزوجت الحرمه يطلع نجم بالسماء كل سنه مره وحده وحظها ونصيبها اذا حملت ولا تنتضر سنه الجايه لكن ما اشبعت رغباتي هالاجابه فعرفت اني متأثر بعدنان ولينا والطاقه الشمسيه

دخلت البيت واصايح بأعلى صوت يمه يمه وردت امي الحنونه بصوت يزيد يوم الخميس جمال وروعه ولعنـه وانا امك وش تبي < امحق حنان

سألتها وين ابوي < شغل البحث والتحري

قالت مدري رايح مع صديقه وبيجي الضهر ليه وش تبي فيه وانا امك ؟

جاوبتها لا ولاشي بنتضره لما يجي وكنت يومي صغير عندي اعتقاد ان الاب هو الي يعلم ابنائه كل شي بهالحياة اما الام فهي تحمل وترضع اول سنه وبعدين تتفرغ للطبخ < لأتلومونه خلأيا مخه تآكلت من هالاسئله الناشفه

رجعت جلست عند الباب اقوم واقعد ماش هالسؤال كنه منشطات ماعرفت اجلس ابي اجااابه شلون الحرمه تحمل وتجيب عيال ياربي وشلون ياربي نزل علي اجابه ارسل علي وحي <لأتلومونه صغير

وانا افكر قطع حبل افكاري جارنا الي كان جاي وجايب معه تميس وهو جاي طلعت له بنص الشارع وقف وقف هو انهبل ووقف وش عندك يا كتوم يالدعله < راجع الكتاب الي قلت لك عليه

سألته وشلون تنجب الحرمه كيف تحمل ؟

ضحك جارنا ضحكه ووجهه متعفط طالع كنه ركبه نبيل شعيل وهو متربع بجلسات روتانا وقال ههههههههه الله يصلحك وانا امك

انا ناضرته مثل الببغاء لاقام يناضر احد قدامه اعفط راسي واقلب بمخي اسئله وهي وش فيه خدوده وصلت جبهته ؟ ووش امك ؟

لا لا السؤال فيه إنأ واخواتها ولا ماختبص وقال وانا امك ...نزل جارنا من السياره وقالي انا اكره مالي بهالدنيا حاجتين الاولى لأشفتك واقف عند الباب والثانيه مالك شغل امور عائليه

طيب وش ذنبي يالجار العزيز تقولي؟ ,,, علينا جار بعد ماتقول الا من ابو ريالين مدري وش يبي من الحياة

ورجعت للبيت مره ثانيه بعد ماعطاني جارنا كم كلمه تهزئ في حق سموي وباين انه كاتم بقلبه من فتره طويله واليوم ماقدر يتحمل الضغط العالي مني وولد الضغط العالي انفجار تولد معه كم كلمه وصخـه
دخلت البيت وانا ااصيح يمه يمه ردت علي امي العزيزه وطاعون يشق بطنك ويرجد بعضمك وش تبي سألتها كم باقي ويجي الضهر ويجي ابوي قالت معد بقى شي الا انت وش تبي فيه ؟ تبي شي تاكله ؟ < هم الي رسخو ببالي

ان الام تطبخ بس

قلت مابي شي ورحت عند التلفزيون وجلست عنده وكان التلفزيون مسكر كنه بيت جيزاني بالدخل المحدود يعني انواع الالوان واشغل الفديو على عدنان ولينا الحلقه الاولى واتابع وانا ما اتابع يعني منشغل تفكيري مره اركز مره مخي يروح يبحث عن اجابه وبالفتره الي كنت مركز فيها لحسن الحظ كان جد عدنان يشرح له قبل يموت انهم وقفو بالطائره على هالجزيره وجابو القصه وكيف انولد وكانو بالقصه يقولون((ولد ولد)) وعند الباب رجال وحرمه!!

هنا وقفت الفديو قلت يعني الدعوه ماهيب نجم يخلي الحرمه تحمل وجارنا تفشل من سؤالي والحين رجال وحرمه يعني يا كاتم الدعوه مشتركه بين الرجال والانثى ؟ ووقفت الفديو طبعا بعد كم اعاده عل وعسى يمكن تجي كيفيه الانجاب بس ماش ماحصلت شي والوقت راح وانا افكر هل الدعوه مشتركه ولا من طرف واحد ؟

وعلى هالتفكير ابوي جاء وحط راسه وانا ذكرت ان الضهر جاء يعني ابوي جاء رحت عند امي يمه يمه ردت علي امي الطيبه

وجعلك الجني الي مايخليك متهني وش تبي ياقلب امه < حنان على جفـااف

وين ابوي قالت ابوك جاء وهو مقصر وحط راسه ويقول لأجاء وقت الغدا حطوه وصحوني مشيت من عند امي وانتضرت لما جاء الغدى وصحى ابوي وجلسنا على الغدى وانا المس بالغدى وكان ابوي مقصر شوي وتوه صاحي من النوم وماله نفس الضاهر بس عاد انا وش اسوي غثيث الا بسئل قلت يبه رد علي بصوت مثل الي يقول مهوب وقتك وقالي وش تبي سكت انا شوي امهد لسؤالي وكنت احس ان السؤال قوي والسبب تعفط وجه ابو الجيران

وسألته شلون يبه الحرمه تحمل!!

امي على طول قالت اجيب لك الشاهي يابونا؟ رد عليها ابوي ايه ايه

قامت امي وابوي انسدت نفسه زود عن الاكل وانا نشبه رجعت له وقلت ماجاوبتني قال شف وانا ابوك الحرمه تاكل بيذجان ان طرشت وداخت اعرف ان البذنجان خايس في بطنها وان ماطرشت ولأداخت اعرف ان البذنجان لقى له مخرج وطلع ,,,,,,,,

وطــــــع < هذا طراق اكلته من ابوي بدون سبب

بعد الطراق قمت وانا مبسوط عرفت وشهي الاجابه ورجعت العب مع عيال الحاره ومر يوم الخميس ذالك اليوم الذي له ريحه خاصه ونكهه بأيام دراسه الطفوله والطماط والفول والتميس له مذاق خاص بذالك اليوم

عدى آلخميس والجمعه وتهيئت للنوم لأن بكره مدرسه وقمت اتسدح على الفراش واتذكر الحصه الاخيره يوم الاربعاء واتنرفز بكره يوم السبت ياطوله كنه راس حناني < مسوي تمون ؟

وفوق هذآ كله عندنا مدرس رياضيات عصبي عصبي بشكل وقاذف بقلوب الطلاب الرعب لدرجه انك تعرف الاجابه بس مافيه ثقه بنفسك يمكن تغلط ويخليك انت والكرسي واحد ولا اذا سئلك ولأعرفت الجواب وقالك حط وجهك على الجدار وقتها تتمنى انك حشره مصابه بمرض التوحد ويجي ورع بأبرد مايكون يرصعك بالنعله وتموت ولأتحط وجهك على الجدار ويجي يلعن خيرك < تعبير نابع من ألــــمّ

جلست اتقلب على الفراش وضاق صدري من مدرس الرياضيات مليت يضربني ضرب الحمير وانا حيلتي اطلع عليه اشاعات بالمدرسه مره طلعت عليه اشاعه انه متزوج سوريه ومرركبها بدبابات الثمامه وهي فاتشه <- اصـدق ما بالقصه

وخذت هذي الاشاعه صدى كبير لدرجه ان وزارة المعارف تكلمو عنها

وانا منسدح على الفراش دخلت يدي بخشمي وفريت مخي ووقف مخي على سؤآل مزدوج والسؤال هو (( كيف يتم الانجاب ولماذا ابوك صفعك )) انا كنت وقتها مستلقي على ضهري وبعد هالسؤال المزدوج قمت وجلست وقلت صح ليه صفعني ابوي كان يجاوبني بهدوء ومحبه فجأه فقد شعوره وعطاني طراق السالفه فيها قص ولزق قال بذنجان قال علينا يمنـااحي

بعد هالسؤال تنشطت خلايا مخي وقمات تبحث عن الاجابه ونسيت مدرس الرياضيات ونسيت ان بكره مدرسه وحاولت انوم بس ماش ماقدرت السؤال سيطر على مخي لدرجه اني اعد وانا مغمض عنز وحده عنزتين وهكذا لحد ماطمرت العنز العشرون الحاجز الخشبي والتفتت علي وقالت لي امبـااع لقيت اجابه ولأ ؟

قمت احرك يديني مثل الي يوخر دخنه عن خشمه ابي اطير هالعنز الله ابوها وقلت مالك يا كتوم الا دواء كحه((ابو زهره)) واروح للثلاجه واطلع الدواء واشربه دفعه وحده ودليل ان مفعوله قوي وسرى بأنحاء جسمي

صرخت بأعلى صوتي بالمطبخ للجحيـم يالقرن الواحد والعشرين < سكر

واروح للفراش وانا اتسحب الي يشوفني يقول شايل تجوري واخمد وانام .

وصحتني امي كالعاده كاتم وانا امك قم قم كتوووم وابوي يصايح ماقام هالملعون تأخرنا على المدرسه وانا انهبل واقوم بسرعه والبس واكل اسرع

واروح للمدرسه واكتشف اني اول واحد جاء << ضحك علي ابوي دايم يسويها

جيت المدرسه جالس انتضر الطلاب والطابور وانا افكر بهالسؤال وجاء الطابور وانا افكر ودخلنا الفصول وانا مشتت الذهن من شده التفكير < قايلكم من اول لو براسه نووي جاب خبره

بدت الحصه الاولى وانا والله مانيب يمها ماغير مطير عيوني فوق كني اطير حمام وافكر بالسؤال وانتهت الحصه وطلع المدرس ورنت صفارة الانذار ((جرس المدرسه)) معلنة بقدوم مدرس الرياضيات والطلاب كل واحد ينتفض بمحله تشوفهم تقول مستنزلين وكابين عليهم ماء بارد دخل المدرس وبصوته الجهوري قال السلام وبدى بالشرح على طول وبحركاته ونضراته الطلاب بدو يتفاعلون معه والفصل جدارنه تشعرت من الازعاج والطلاب متحمسين يبون يشاركون والمدرس تفاعل معهم وكاآتم خويكم غـــرق ببحر التفكير ولأهوب يمهم وبينما الطلاب يصايحون يبون يشاركون والفصل ازعاج حاولت اشارك معهم ورفعت يدي على عماها قال المدرس احسنت < مو مصدق

كاتم جاوب جاوب كان يقولها وهو يسعبل وعاض على لسانه وانا وقتها ضاعت علومي ولا ادري وشهو سؤاله عشان اعرف الجواب والسؤال الي بمخي جاء قدام عيوني تلعثمت وطقتني ام الركب وسكت يمكن حدود ثلاث ثواني بس بذاك الجو والارتباك الي حصل تعتبر ثلاث سنوات بلياليها وانا ساكت بالثواني هذي صرخ المدرس جاوب ياحمار قلت له كيف تحمل الحرمه وبلعت ريقي وقمت ارمش مع سؤالي الغبي هذا الفصل بعد الازعاج والصخب الي صار فيه سكت والطلاب كلهم التفتو علي حتى المكيف الي يرنع سكت ووقف وقال يـــاااويله <<خخخخ

المدرس كان ينتضر اجابه وانا عطيته سؤال ادى الى تشنج خلايا مخه وقام يتنفض ويقول العن ابوك وجاء من الجهه الثانيه بالفصل ولعن خير خيري ((made In Italy)) هذي نعلته صناعه إيطاليه طبعها على جبهتي وبعد الضرب المبرح انسدحت بالارض كني من جرحى حركه حماس وقرب مني وانا يالله ارفع البؤبؤ حق عيوني مافيني حيل بعد الضرب وقالي تبي تعرف الاجابه تعالي بغرفه المدرسين لحالك وكمل الشرح وانا جلست على الكرسي وافكر بنضراته فيها شي من الخبث وقلت بنفسي وش فيه يناضر كذا وبحقـد ؟ < على نياته

وانتهت الحصه والطلاب جو يواسوني بعد الجلد والي رحمني وراح يشتريلي فشار من المقصف وانا ملعون رحت طلعت عليه اشاعه ان المدرس حاط على سور بيته قزاز عشان قد طبو على بيته شباب سكارى يبون يغتصبون حرمته وبعدها وسوس < اصدق ثاني شي بالقصه

وعدى اليوم الدراسي وانا افكر وضاق حالي من هالشي ابي اجابه وارتاح معد اعرف اسولف كل شي بمخي كيف تحمل الحرمه معد يهنى لي شي الاابي اعرف حتى سالي كانت تجي العصر وانا احبها حب جمـا ماهتميت لها ابي اعرف الاجابه رحت ارتزيت عند الباب وجلست وانا اجلس ماغير اقول اي اح حسبي الله عليك يامدرس الرياضيات وانا كنت اخذ وضعيه الجلوس بدون الم انفتح الباب الكبير حق جارنا الثاني وبنتهم يمكن انها بسادس ابتدائي تشطف الماء للشارع كانو غاسلين حوش بيتهم واجي انا مدرعم لها وسألتها بدون مقدمات ولا شي كيف تحمل الحرمه دامك حرمه جاوبي يوم قالت قليل ادب ونحو كمان < جداوية

وصكت الباب بقوه وانا استغربت وقمت اشبك كل الاجوبه مع بعضها يعني جارنا اول شي تعفط وجهه وقال الله يصلحك وانا امك ثم تشربك مخه والتمس وعصب علي فجأه ؟

وابوي الي يوم سألته جاوبني بهدوء وفجأه فقد شعوره مادريت الا وهو خامني بطراق خلاني ما اسمع سنه وليـه ضربني ؟

ولا مدرس الرياضيات لو قلنا اني انا الغلطان سألته سؤال مهوب بوقته بس ليه ذيك النضرات وتعالي لحالك بغرفه المدرسين ؟

والحين بنت جارنا صكت الباب وتقول قليل ادب ؟

وش السالفه شلون اعرف الجواب ومن وين اجيب الي يجاوبني ؟

ايــــــه ياكاتم اول القصه قلت لأعضاء المنتدى فيه مدرس مصري خصوصي يعرف كل شي ولأيقول ماعرف رح اسئله منها تلاقي جواب ومنها تخلص القصه وتنتهي نهايه حلوه
وانا الي اطمر للبيت واروح للتلفون وادق على المصري

انا : طووووط طوووووط < بيت المصري يرن
المصري : الووه مين بيتكلم بتحب نتعرف؟ < متأثر بدعايه فودافون
انا:الو هلا استاذ كمال ابو المعالي انا كاتم
المصري:هلا كتوم بيه ازيك عامل ايه < بالزمه مش انا شاعر
انا:اها بس لا ادخل رجلي مع السماعه بوسط حلقك شف ياكمال ابي منك تعلمني كيف تحمل الحرمه
المصري:اللــــــه ايه الكلام ده بتئول ايه يابلطقي
انا:بلطقي اوم حدرتك((حضرتك)) ياعلي عوض ,,, طبعا الاجابه بفلوس
المصري:آه ربنا يكرمك ويفتحها بوشك((وجهك))
انا:خلاص تعال المغرب ولأسئلك ابوي قل ادرسه قواعد اوكي لا تجيب فيني العيد انت واذانك الي كنها زنوبات هندي حارس المسجد
المصري:ماتخفشي يله إنتا واذانك الي شبه سبراي شافط صواعق لو سألني ابوك راح اعطيه مخرق يطلعووه على شارع الغورابي (( الغرابي ))
انا:اوكي حلو مع السلامه
المصري:مع الف سلامه ربنا يكرمك

وجاء المصري بعد صلاة المغرب ودخل عندي وخليته يشرح ويكتب الكلام بدفتر وحلفت له اعطيه خمسميه ريال عشان يتحمس ولأيبقي شي الا يقوله ويكتبه وكان يكتب ويكتب وانا شكلي رايح فيها مفهي الكلام وصل للغويط طبيت بعلوم مهيب لي شعر راسي وقف والمصري خلص الكتابه لأن الدفتر خلص وانا مسكت الدفتر ورحت عند الباب وفتحته وقلت له شف ياكمال افندي بعد لخمسه اذا ماطلعت رحت لجارنا الي بالهيئه بقوله اني طلبت منه يدرسني قواعد درسني علوم غير اخلاقيه وهذا الدفتر يثبت ذالك < خيانه

المصري وقف وقالي يخرب بيتك متل ماخربت بيتي ربنا يوريني فيك يوم اسود متل سواد ركب بنتات السعوديه إنك حووومار ياشبه قاموس النيل < يذب المصري

قلت له حومار ولا جاموس ارس على بر يالبقره العانس وربي انك ثور < انت بعد ارس على بر

وقمت اعد واحد اثنين ثلأثــ ,, ما امداني اكمل ثلاثه الا اشوف غبار والمصري هج وانا جلست ماسك الدفتر بيدي وانتفض يعني هالدفتر لو يطيح بيد ابوي بينفيني لمثلث برمودا بهالدفتر يعني كل اسرار زوج وزوجـه وجلست اتصفحه واقرى واقرى كلام يعني الي قريته امي وابوي يسوونه ؟ ابو جارنا وحرمته يسوونه ؟ يعني كل متزوج ومتزوجه يسويه ؟

الحين عرفت ليه جارنا وجهه تعفط يحق له وعرفت ليه ابوي فقد شعوره وصفعني بطراق ومالومه ولأ الوم بنت جارنا الي صكت الباب بوجهي بعد هالاسرار الخطيره الي غايبه عن بوش ولا كان قصف كل بيت متزوج ومتزوجه

هذي دمار شامل هذي الاسرار وش مفاعل نووي طهران عندها
بس الي ما الومه ابن الكلب مدرس الرياضيات ليه يقولي تعال لحالك لغرفه المدرسين < توه يفهم

اوريك يالمدرس متى يجي بكره ((<- حاقد)) وانا افكر وش بسوي وش اقوله وافكر بهالاسرار ربشني وكهربني صوت مؤؤذن مسجد الحاره الله يهديه مايشغل المايكرفون ويتنحنح لا على طول ماتدري الا وهو يقول الله اكبر وهو أذن ولا مأذن انا ارتبشت وذبيت الدفتر ثم رجعت اخذته ابي اوزيه وكل هذا احسب الحكومه طبت علي عشان هالدفتر بعد ماهدى بالي وتأكدت انه ابو جلعود مأذن الحاره رحت لأمي وقلت لها ابي عشى وابي ارقد

< مهوب لله ترقد بدري تبي تتفحص الدفتر

وفعلا تفحصت الدفتر ورقدت وانا مرتاح اخيراً لقيت الجواب ورحت للمدرسه واول ماجيت المدرسه رحت لمدرس الرياضيات قلت له يسلم عليك ابوي ويقولك لا جيت تعلم ولدي بالغرفه لحالك جب معك حرمتك بالغرفه عشان تشرح شرح تطبيقي وليدي الله يهديه مايعرف نضري
المدرس العصبي اخذ اوكسجين كامل وهو مغمض عيونه وفصخ النضاره ومادريت الا وانا اكتب لكم القصه الحين بالدور الثاني مستشفى الملك خالد الجامعي قسم العضام دبغني الكلب دبغ اقشر ماتقول الا هو يهودي وانا من اطفال غزه
أ.هـ
القصه من كتـاب (( كفاحي والفقر )) تجدونه بمكتبه جرير للمؤلف ك . ك مع نفسه

مآيستـفـااد

لأتسئلو عن اشياء ان تبد لكم تسوؤكم
اليد الي ماتقدر عليها لأتصـافحها طلع عليها اشاعه < تلايط بس
لأبد لنا من الثقافه بهالموضوع عشان نقلل من حالات الطلاق فـ نسبه الطلاق بالسعوديه اغلبها الجهل بأمور كهذه
وبس
ســــــلاام

لا حول ولا قوه الا بالله

يازينك اخوي وانت ساكت

ومشكور على السالفه الطويله

انت بكل صراحة واااااااو

تقبل مروري خيووووووووووو